Kikohigaganan do Mimpuupula

Kivaa dati' nakabasa do iso' kinaantakan totopot id Pogun Sina kokomoi songuhun ii nakapamatai. Tuutulus disido do minogidu om minizon doid iso kinoizonon ii osodu mantad tinindoozon haid disido. Mooi do au' isido oihaan, pinoohon disido o ngaan dau, minimpuupula do nobobou - au' koboos, kaaka bo - om mokiukut nogi isido.

Vahiu no vagu isido do izonon ii kuang hobi do 700 kilomito sinodu. Nakaanu isido do kalaja do monoodo do nunu noopo (hamin, talunalun) om nakasavo isido do savo koduvo. Sohinaid diti tuminihombus isido do mimboobobou. Koikot no timpu do pulis do mongiho do tuhun ii songingizon id kinoizonon dii. Sabap do aiso suat kointutunan disido do nimaan isido gokomo om mantad do DNA nointutunan do isido no ii minamatai dii. Nimaan isido ovito doid kuut nga' au' nodii isido koboos om suaton dii disido nunu ii pobooson dau.

Sabap no do au' insan isido poboos do sohinaid 12 toun do natagak ohou disido. Otootopot do nadadi isido do songuhun ii nobobou. Nokokodou o tonsi tontologukan disido.

Kivaa nogi noihaan ku songuhun tuhun Sabah - okonko tuhun KDM - ii minongimang songuhun tondu. Songuhun kusai tagazo tuhun dii. Nagakom isido do polis. Minimpuupula isido do muhau gisom no do novit do maan bisalao. Nimaan isido pootodo' om pinosuang id hamin di tuhun di noumbak tutok. Mantad di noihaan ku di somok-somok opod (10) toun nakatahib, kakaal po tuhun dii id hamin pongusapan tuhun nakahasa tutok id Bukit Padang, id Kota Kinabalu.

Sabap no do minimpuupula tuhun dii do 'muhau' do nokotopot do muhau isido.

Na', nunu dii abalajalan tokou mantad do duvo susuzan totopot diti?

Somok otikid tuhun dati do nakasavang do mimpuupula. Piahatan nopo miampai kinaantakan dihia nokomoi id savat nga' kogumuan dioho do au' timinihombus do mimpuupula. Om au' di nokoimagon do otopot ii ula-ula di au' avasi.

Komungkangan do mimpuupula au' momihi do nunu ningkokoton do tuhun di kuminam do moningan di ula-ula kavavagu. Au' momihi ii do nunu tinau', id nombo poingizon id vinoun diti. Ii po opulokis nga' kivaa nogi mimpuupula. Dati do hobi pandai zioho do mimpuupula gisom do au' oihaan.

Nga' soovon daa dotokou do adadi tokou do nunu ii kohizaban tokou do dumadi. Nung avasi o kaandak tokou, adadi tokou do avasi. Nung alaat o kaandak tokou, adadi tokou do alaat. Kivaa katapatan diti, kangku daa. Om katapatan au' dumadi do ovudut sundung do maan ohimo do otopot ii.

Tumanud diho duvo kinaantakan, ingkaa no id koposizon. Kivaa husi' toi' vava di lahan pogiigizon ii pihion tokou.

Kounsikaan do toun vagu 2018. Mogkongoo' kou no daa.